Вести
Македонија ги дозна противниците во најновото издание од Лигата на нации
12.02.2026г
Македонската фудбалска репрезентација ги доби вечерва противниците за настапот во најновото издание од Лигата на нации во која ќе дебитира во Б сегментот во група со Шкотска, Швајцарија и Словенија.
Предводникот на националниот тим Гоце Седлоски по жрепката во Брисел искажа респект кон репрезентациите со кои ќе се соочиме, но и верба во своите избраници кои можат да докажат дека македонската репрезентација сосема заслужено се наоѓа меѓу нив.
„Шкотска и Швајцарија се главните фаворити во групата. Станува збор за две селекции со континуитет на настапи на големи натпреварувања, учесници и на претстојното Светско првенство. Имаат квалитет и искуство на највисоко ниво. Тоа доволно зборува за предизвикот што нè очекува. Но, ние не влегуваме во овој циклус со улога на аутсајдер. Нашата цел е да бидеме конкурентни на секој натпревар, без разлика дали играме дома или на гости. Ќе се трудиме да го наметнеме нашиот стил на игра, дисциплиниран, организиран и храбар. Да покажеме дека Македонија со право е дел од Лига Б“, изјави Седлоски.
Петтата по ред сезона во Лигата на нации ќе стартува во септември, а групната фаза ќе финишира во ноември.
„Имаме генерација која веќе е зрела, имаме јасна идеја како сакаме да изгледаме на теренот и треба да веруваме во квалитетот. Со максимален фокус, посветеност и тимски дух, верувам дека можеме да одговориме на предизвикот“, додаде македонскиот селектор во изјава за официјалниот сајт на ФФМ.