Бизнис
ГОЛЕМИТЕ КОМПАНИИ ВО ХРВАТСКА МОРААТ ДА ИМААТ 40 ОТСТО ЖЕНИ НА ВОДЕЧКИ ПОЗИЦИИ
08.01.2025
До крајот на јуни 2026 година во управните и надзорните одбори на големите домашни компании, кои котираат на Загрепската берза, ќе треба да имаат 40 отсто жени или 33 отсто на сите директорски позиции. Ова е предвидено во Европската директива за подобрување на родовата рамнотежа меѓу директорите на котирани друштва, која стапи на сила на крајот на минатата година, а со измените на Законот за трговски друштва беше применета во законодавството на Хрватска.
Мал број на домашни компании ќе мора да се прилагодат на новите правила, бидејќи директивата за родова рамнотежа ги обврзува само оние кои вработуваат над 250 работници, чии приходи надминуваат 50 милиони евра, а имотот над 43 милиони евра. На домашниот пазар на капитал во Хрватска има само 24 вакви компании.
Законските одредби налагаат доколку компаниите не ги исполнуваат критериумите за рамнотежа на половите, да донесат посебни правила за избор на кандидати за членови на надзорните и управните одбори. Целта на правилата се јасни и се однесуваат на неутрални и недвосмислени критериуми при изборот на кандидати. Меѓутоа, ако се разгледуваат два или повеќе кандидати со еднакви квалификации и способности, предност мора да се даде на недоволно застапениот пол, се вели во законот.
Големите компании во Хрватска сега имаат една и пол година да се усогласат. Според последните податоци на Европскиот институт за родова еднаквост, жените заземаат само 25 отсто од управните и надзорните одбори и директорските позиции во 20-те најголеми компании котирани на Загрепската берза.
Според европскиот индекс за родова еднаквост Хрватска е на дното на рангирањето на земјите членки на ЕУ (на 24 место со индекс 59,7), а лани падна за еден поен во однос на 2023 година, пренесува „Пословни дневник“.
фото freepic