Бизнис
Гацов: Клучни за подобрување на економската состојба ќе бидат реформите во првосудството и во бизнис-средината
Што очекувате од 2025г.
Економија и бизнис | печатено издание | 15 декември 2024г.
„И 2025 година е изборна година. А во изборна година, освен вербално, реално економијата не е во прв план. Имено, тогаш преовладува интересот за ефектите од изборите, односно за изборните резултати и во тој контекст креаторите на политиките заради остварување на краткорочни ефекти кои ќе остават впечаток пред избирачите ќе реализираат зголемено трошење на буџетските средства (централно и локално) и ќе водат експанзивна фискална политика. Монетарната политика и овој пат ќе мора да го имобилизира влијанието на засилената јавна потрошувачка и политиката на реално зголемување на пензиите и на платите.
Од друга страна, во 2025 година ќе продолжат глобалните и регионалните политички и економски ризици, а на домашен терен врз состојбата на македонската економија ќе влијаат одржувањето на политичката стабилност, структурните реформи и динамиката на инвестиции. Клучни за подобрување на економската состојба ќе бидат реформите во првосудството и во бизнис-средината, во јавните инвестиции, во инвестициите во дигитализација и во иновации, во поттикнувањето на извозот и на домашното производство. Буџетската поддршка на компаниите и на локалната самоуправа, трендот на раст на странските инвестиции и ЕУ-финансиската поддршка ќе имаат позитивно влијание врз домашната економија“.