Бизнис
ВО НИГЕРИЈА ОТКРИЕНИ ИЛЕГАЛНИ РАФИНЕРИИ НА НАФТА!
03.01.2025
Војската и полицијата во Нигерија откриле и запечатиле 56 илегални складишта со украдена сурова нафта, со тоа нанесоа тежок удар на илегалната трговија со нафта во земјата. Во акциите на воените сили се одземени лимени буриња, но и опрема за рафинирање на суровата нафта. Во широката операција се вратени околу 1,2 милиони литри украдена нафта, а уништени се најмалку 15 илегални рафинерии. „Дивите“ капацитети за преработка на нафтата се наоѓаат во шумите во близина на градот Јанагое во сојузната држава Бајлеси на крајниот југ на земјата. Целата област е дел од делтата на Нигер, која е богата со нафта.
Нигериските сили уапсиле 17 осомничени лица и биле запленети поголем број на возила и опрема за преработка на нафтата, објави „Дојче веле“.
Според податоците на Нигериската иницијатива за транспарентност на фосилната индустрија, Нигерија во периодот од 2009 и 2020 година изгубила околу 620 милиони барели сурова нафта, во вредност од 46 милијарди долари!
Нигерија е најголем производител на нафта во Африка, но земјата се соочува со сериозни проблеми поради масовната кражба на нафта и саботажите на нафтоводите. Кражбата на нафта е присутна со години, но во последниoт период криминалците ги усовршиле своите методи. Умару Ахмаду, финансиски консултант за нафта и гас, смета дека кражбата на нафта ќе продолжи се додека нигериската влада не го реши прашањето со социјална и економска правда во регионот.
- Населението во нафтоносните подрачје нема инфраструктура, немаат основна социјална и економска поддршка, вели Ахмаду, пренесува РТЦГ.
фото freepic