Бизнис
ПАЃА ПРОДАЖБАТА НА АВТОМОБИЛИ НА ГОЛЕМИТЕ ЕВРОПСКИ ПАЗАРИ, СО ИСКЛУЧОК НА ШПАНИЈА
19.12.2024
Во ноември во ЕУ се регистрирани 869.816 нови автомобили, што е намалување за 1,9 отсто на годишно ниво.
Во земјите од Европската Унија во ноември се регистрирани 869.816 нови патнички автомобили, а тоа е намалување за 1,9 отсто во однос на истиот месец лани, објави Асоцијацијата на европски производители на автомобили (ACEA).
Резулатите за продажбата на главните европски пазари укажуваат на остар пад на продажбата на автомобили на годишно ниво: во Франција за 12,7 отсто, Италија за 10,8 отсто, додека продажбата во Германија стагнира. Раст на продажбата на автомобили од 6,4 отсто е забележан само во Шпанија.
Во ноември, најголемо учество во продажбата на нови автомобили имаат хибридните електрични возила со 33,2 отсто, по што следат возилата на бензин со 30,6 отсто, електричните возила на батерии со 15 отсто и автомобилите на дизел со 10,6 отсто. проценти.
Бројот на регистрирани електрични возила со батерии во ноември се намали за 9,5 отсто на годишно ниво односно на 130.757 автомобили, пред се поради падот на новите регистрации во Германија за 21,8 отсто и во Франција за 24,4 отсто.
Во првите единаесет месеци од 2024 година бројот на нови регистрирани автомобили во Европската Унија изнесува 9,7 милиони возила (зголемување за 0,4 отсто). За истиот период во ЕУ се регистрирани 1.303.686 нови електрични возила на батерии, што е за 5,4 отсто помалку во однос на истиот период лани, пренесува „Еуроњуз“.
фото freepic