Бизнис
ВО БАЛТИЧКИТЕ ЗЕМЈИ НАЈМНОГУ ПЕНЗИОНЕРИ ПРОДОЛЖУВААТ СО РАБОТАТА
10.12.2024
Во Европската Унија 13 отсто од граѓаните кои се на возраст од 65-67 години работат и по пензионирањето. Приближно половина од луѓето кои продолжиле да работат својата работа ја извршуваат под исти услови како пред пензионирањето, додека другата половина го промениле работниот однос или го намалиле бројот на работни часови, се наведува во извештајот на Евростат.
Истражувањето спроведено минатата година покажа дека најголем број луѓе кои работат по пензионирањето е регистриран во балтичките земји на ЕУ - во Естонија 54,9%, Летонија 44,2% и Литванија 43,7%.
Најмал удел на вработени пензионери е забележан во Романија - 1,7%, во Грција е 4,2% и во Шпанија 4,9%.
На прашањето зошто продолжуваат да работат и по пензионирањето, најголем број од испитаниците, поточно 36,3% од нив изјавиле дека уживаат во работата и сакаат да бидат продуктивни, додека 28,6% одговориле дека им се потребни финансиски средства.
Околу 11,2% од анкетираните изјавиле дека сакаат да го зачуваат својот социјален живот, додека 9,1% истакнуваат дека нивната работа е финансиски профитабилна.
Најголем процент на луѓе кои продолжиле да работат затоа што уживаат е забележан во Данска - 61%, Холандија 59,6% и Италија 51,7%, а најмал е во Шпанија - 17,9%, потоа Кипар 19,1% и Словачка 20,4%, пренесува „Бизнис и финансии“.
фото freepic