Бизнис
ОД 1 ЈАНУАРИ МИНИМАЛНАТА ПЛАТА ВО СРБИЈА ПОВИСОКА ЗА 14 ОТСТО
07.12.2024
Минималната плата во 2025 година во Србија ќе биде повисока за 13,7 отсто и во просек ќе изнесува околу 53.590 динари (460 евра). Од 1 јануари оваа плата ќе се зголеми од 47.154 динари, додека минималната цена за работен час ќе биде 308 динари. Како надоместок, работодавачите добиле зголемување на неоданочливиот дел од платата за ист процент за што е зголемена минималната плата - 13,7 отсто, што е во номинален износ 3.423 динари. Затоа, наместо досегашните 25.000 динари, следната година нема да се оданочуваат 28.423 динари.
Небојша Атанацковиќ, почесен претседател на Сојузот на работодавачи на Србија, вели дека во земјата официјално има околу 100.000 работници со минимална плата, но уште неколку стотици илјади вработени земаат плати кои не се најниски, но се блиску до тој минимален износ.
- Владата прифати да се обесштетуваат работодавачите, со зголемување на неоданочливиот дел од платата. Треба да се има предвид дека трошокот за бизнисмените не се изразува само во данокот на минимална плата. Нема да се плаќа до износот од 28.000 динари, но сепак ќе се плаќа на таа зголемена плата, околу педесет проценти од се останато, што се придонеси за пензии и здравство, вели Атанацковиќ.
Чеданка Андриќ, претседателка на УГС „Независност“, за „Политика“ вели дека во моментот кога синдикатите преговарале за минималната плата знаеле дека тоа не е она што ќе ги задоволи граѓаните, туку дека е важно по долги години работите да бидат поместени од мртва точка.
- Движењето на инфлацијата и на трошоците за живот ќе го видиме од јануари и доколку има некои поголеми пореметувања, секако дека ќе иницираме корекции во текот на годината, а таа можност ни ја дава и сегашниот Закон за работни односи. Минималната плата никогаш не може да биде висока и никогаш не сме задоволни, но добро е што покачувањето на минималната плата најчесто ги турка и другите плати, вели Андриќ, објави „Политика“.
фото freepic