Бизнис
Саем за вработување во организација на Стопанската комора и Ромалитико
04.12.2024
Претставници на 25 компании членки на Стопанската комора денеска директно разговараат и интервјуираат околу 130 невработени Роми во рамки на Саемот за вработување организиран од Ромалитико во соработка со Стопанската комора.
- Целта на настанот е ромската заедница денеска да има директни интервјуа со приватните компании со цел побрзо да се вработат, изјави извршниот директор на Ромалитико, Елвис Шакири пред почетокот на Саемот за вработување што денеска се одржува во Скопје.
Во изминатиот период преку овие програми околу 420 невработени Роми биле поврзани со компании од приватниот сектор.
Претседателката на Советот за унапредување на квалитетот на тренингот и обуките при Стопанската комора, Наташа Јаневска рече дека увозот на работна сила во земјава не се покажа како најдобро решение и додаде дека токму недостигот на работна сила е еден од клучните проблеми со кои се соочуваат компаниите поради што трпи и целата македонска економија.
- Стопанската комора, која сака да го привлече работоспособното население во нашата држава, токму затоа организира вакви саеми за да можат компаниите да ги надополнат работните места со стручен кадар. Саемот треба да претставува можност и за останатите компании да дојдат до побрзо вработување на лицата кои се на располагање во нашата држава, а со тоа да придонесеме за поголема продуктивност на компаниите и на македонската економија, рече Јаневска.
Покрај саемите, Стопанската комора, како што кажа, работи и во делот на дуалното образование за подготовка на стручен кадар со побрза вработливост, но и преку Советот за унапредување на квалитетот на тренингот и обуките се труди да обезбеди побрз и поефикасен начин на вработување преку преквалификација, доквалификација и обука на невработените лица.
- Како Стопанска комора често размислуваме како да им помогнеме на македонските компании и нашата цел е преку ваквите саеми и преку обуките за преквалификација и доквалификација да им помогнеме ним и на македонската економија во целост. Се обидуваме да најдеме кадар за преквалификација и доквалификација со посредување на Агенцијата за вработување, но често ни се јавуваат и поединечни лица и врз основа на тоа ние организираме обуки на барање на компаниите. По завршување на обуките компаниите имаат можност да ги вработат лицата кои ги посетувале, потенцира Јаневска.
УСАИД е посветена на инклузивноста што ги зајакнува демократијата, човековите права и економскиот раст. Преку нашите програми, 420 Роми се вработија во приватни компании или преку грантови за самовработување. Овие програми ги надминуваат работните места - тие градат достоинство, безбедност и патишта кон подобра иднина, изјави денеска претставничката на канцеларијата на УСАИД во Северна Македонија, Џери Дајбл на отворањето на Саемот за вработување во Скопје во организација на Стопанската комора и „Ромалитико“.
- Соработката е клучна за напредок. Денеска ги поздравувам „Ромалитико“ и Стопанската комора на Северна Македонија за поврзувањето на Ромите, кои бараат работа со инклузивни работодавци како што е корпорацијата „Лаер“, што вработи над 200 Роми, вклучително и во лидерски улоги, подвлече Дајбл.
Таа потсети дека благодарејќи на партнерствата меѓу Владата на Северна Македонија и меѓународните организации, повеќето од Ромите без државјанство, сега имаат изводи од матичната книга на родените - отклучувајќи пристап до образование, здравство и работа, пренесе МИА.