Бизнис
ГОРАН АНТЕВСКИ: ВО КОМПАНИЈАТА ПОБЕДУВА ТИМОТ И СИТЕ ТРЕБА ДА БИДАТ НАЈДОБРИ
25.11.2024
Со добро организиран и мотивиран тим може да се победат и поголеми компании од себе, како што на времето грчката репрезентација во фудбал, под водството на искусниот германски селектор ја освои европската титула победувајќи и посилни тимови како Франција и Португалија. Кога ќе се појават „ѕвезди“ имаме проблем, сакаат сами да се промовираат. Но тимовите се тие победуваат и сите треба да бидат најдобри. Самостојно може да се победува само во тенисот, изјави Горан Антевски, генерален менаџер на Раде Кончар ТЕП, на Панел-дискусија „Среќата како бизнис стратегија: Успешни практики од домашните компании“, организирана од М6 Едукативниот центар.
- Мојот ментор ми го смени погледот како да се подобрам самиот во професионалниот развој. Сите ние се менуваме, а јас сум повеќе тимски играч. Во нашата компанија доаѓаат работници од средните училишта и факултетите. Ретко преземаме работници од други компании. Сите што се вработени кај нас поминуваат низ процес на запознавање со производниот процес. Практикуваме менторски пристап, но важно е вработениот да сака да научи, а за тоа овозможуваме и разни обуки. Кадровски се стабилизиравме, платите се коректни. Секојдневно сум присутен меѓу вработените и достапен да ги сослушам сите потреби и интереси, вели Антевски.