Бизнис
СРЕЌА Е ДА СЕ ИМА МЕНТОР ШТО ЌЕ ГО ВОДИ РАБОТНИКОТ НИЗ ПРОФЕСИОНАЛНИОТ РАЗВОЈ, ВЕЛИ МАРИЈА ДУКОВСКА ПАВЛОВСКА
25.11.2024
Мојот кариерeн пат е комбинација на искуство и среќа. Имав среќа да работам со директори отворени за соработка. Се прашувам и сега од оваа позиција, што ќе се случеше ако раководителот во тоа време беше суетен и не го прифатеше мојот план за организациски промени во компанијата, и тоа го разбереше како критика? Среќа е да се има ментор кој ќе го води вработениот низ неговиот професионален развој. Платата е може да биде краткорочен мотиватор и подоцна станува и ограничувачки фактор за напредувањето. Но платата не е и главната причина при одлуката за некој да замине или да остане во компанијата. Посветеноста кон вработените е пресудно за здрава работна атмосфера во компаниите. Нема да вредат ни најдобрите технички системи или ИТ решенија, доколку луѓето не се подготвени да ги применуваат промените кои се неопходни во компанијата, изјави Марија Дуковска Павловска, генерален директор во Макстил, на Панел-дискусија „Среќата како бизнис стратегија: Успешни практики од домашните компании“, организирана од М6 Едукативниот центар.
Во Макстил, се прават и интервјуа со потенцијалните вработени, за тоа што е нивното пошироко интересирање за тоа колку се навикнати или подготвени да ги прифатат работните услови во компанијата поради специфичноста на производниот процес.
- Безбедноста на вработените ни е на прво место и затоа воведуваме автоматизација во деловите каде што е тоа можно. Важно ни е да ги обучиме вработените да искажат свое мислење и да ги препознаат и пријават евентуалните неправилности. Луѓето и не пријавуваат од причина што и не знаат да го препознаат неправилности. Со ваквиот пристап флуктуацијата на работниците ја доведовме на подносливо ниво. Практикуваме да користиме препораки при вработувањето и да понудиме добра работна атмосфера и со добро платени работни места. На новите генерации се обидуваме да им ја претставиме пошироката приказна за тоа што го работиме како компанија, а нашите политики за вработувања ги прилагодуваме и на нивните потреби и интереси, вели Марија Дуковска Павловска.