Кризата во ИТ индустријата во светот не се намалува и продолжуваат отпуштањата од глобалните компании. Во светот во последните две години се отпуштени повеќе од 400.000 работници. Последиците од оваа криза се пренесоа и на ИТ компаниите во регионот, посебно на оние кои се зависни од нарачките на странските компании. Новото истражување на Српската ИТ асоцијација (СИТА) покажува дека 61 отсто од српските ИТ компании морале да даваат откази.

Околу 27 отсто од компаниите наведуваат дека отпуштиле до пет отсто од вработените, а 34 отсто повеќе од пет отсто. Околу 39 отсто од компаниите во Србија кои учествувале во испитувањето не бележат значителен број на откази на работници од информатичката дејност, објави „Форбс.Србија“.

Недоволно конкурентните плати и бенефициите биле наведени како проблеми од 31 отсто од анкетираните ИТ компании. Зголемените трошоци односно инфлацијата биле посочени од 27 отсто од компаниите, а проблемот со зголемувањето на конкуренцијата на пазарот го посочиле 17 отсто од компаниите.

- Третина од компаниите се соочуваат со предизвикот за задржување на талентите поради притисокот на платите, изјави Марко Вучетиќ, директорот на Асоцијацијата, во изјава за „Форбс Србија“.

фото freepic