Бизнис
Формиран Совет за поддршка на женско прeтприемништво на Општина Карпош
16.11.2024
Во амфитеатарот на Универзитетот Скопје денеска се одржа конститутивната седница во чии рамки официјално беше формиран Локалниот совет за женско претприемништво на општина Карпош (ЛСЖП). Оттука, во работна атмосфера присутните расправаа и полноправно одлучуваа по неколку точки кои се најдоа на денешниот дневен ред. Вера Бошковска едногласно беше избрана за Претседател на ЛСЖП, додека пак за нејзини заменички беа избрани координаторката од Општина Карпош за еднакви можности меѓу жените и мажите, Виолета Михајловска и претставничката од приватниот сектор, Марина Терповска Штарго. Славица Новевска ќе ја извршува функцијата Секретар на Локалниот совет за женско претприемништво на општина Карпош.
Во текот на седницата се расправаше и за повеќе конструктивни предлози кои треба да резултираат со изработка на годишна програма за работа на Локалниот совет, како и за конципирање на повеќегодишна стратегија според која ќе функционира ова тело. Според статутот, ЛСЖП е предвиден да работи во насока на подобрување и унапредување на економско - финансиската независност кај жените кои живеат или работат на територијата на општината. Oд исклучително значење е зајакнување на капацитетите на граѓанските организации за женско претпримништво, со цел ефикасно креирање на политики преку кои ќе се застапуваат интересите на жените во локалните и национални власти.
На иницијативата за формирање на Локалниот совет за женско претприемништво и претходеше Декларацијата за подобрување и унапредување на положбата на женското претприемништво, која во февруари оваа година ја потпишаа градоначалникот Стевчо Јакимовски и претседателката на Националната платформа за женско претприемништво, Валетина Дисоска.
Извор МИА/Општина Карпош