Бизнис
СВАДБИТЕ ВО СРБИЈА ПОСКАПЕА И ЧИНАТ НАД 20.000 ЕВРА!
10.11.2024
Порастот на цените на угостителските услуги во Србија ја зголемија и вкупната сума која треба да се одвои за организирање на свадбената свеченост, чија просечна вредност достигна меѓу 20.000 и 22.000 евра.
Според податоците на Републичкиот завод за статистика храната во септември во Србија е поскапа за 9,6 отсто во однос на истиот месец лани. Така, цената на менито за топли и ладни предјадења е зголемена за 10 отсто, за готовите јадења за 8 отсто, печењето е поскапо за девет отсто, алкохолот за 8,6 отсто и безалкохолните пијалоци за повеќе од 10 отсто.
Претставникот на компанија од Белград која организира свадби и други свечени настани во изјава за Н1 вели дека цените за венчавки се поевтини во месеците надвор од сезоната, а тоа е од ноември до Велигден. Во овој период рестораните нудат пониски цени за свадбено мени за 10 до 15 отсто.
Во просек цената за еден гостин изнесува околу 20 евра, а некои од младенците покануваат до 550 гости. Во Белград цената на свадбеното мени достигнува и до 150 евра, но просекот е од 50 до 52 евра со целокупна услуга: од храна, пијалок, декорации... . Годинава тренд е венчавките да бидат во винарии и тоа чини 100 евра за еден гостин.
На ова треба да се додаде и трошокот за венчавката во црква од 15.000 до 50.000 динари.
Цените на тортите се движат од 1.600 до 4.000 динари за еден килограм, просечната цена со декорацијата е околу 70.000 динари.
Цената на букетите за невестата е од 3.500 динари до 200 евра, но просечната цена е околу 50 евра.
За фотографирање на свадбената манифестација се плаќа од 600 до 800 евра, а во ова се вклучени 350 до 400 фотографии. Гостинот ги плаќа фотографиите по 280 динари, а во сезона на свадбите до 300 динари. Снимањето на свадбата се плаќа дополнително од 400 до 1.500 евра. На ова треба да се додаде и цената на венчаницата и за ангажирање на музичка група и тие се плаќаат секој според своите материјални можности, пишува Н1.
фото freepic