Бизнис
ТУРИЗМОТ НА БЕЛИОТ КОНТИНЕНТ ДОЖИВУВА ЕКСПАНЗИЈА!
05.11.2024
Бројот на туристи кои сакаат да го посетат Антарктик е во постојан пораст по завршувањето на пандемијата со коронавирусот. Туризмот на белиот континент во последната деценија доживува експанзија. Од 1990 година секоја година го посетувале околу седум илјади туристи. Годинава бројката надмина 122 илјади посетители, покажуваат податоците на Меѓународната асоцијација на туроператори на Антарктик (IAATO).
Пред неколку децении до Антарктикот се патувало со помали бродови, главно од поранешната руска флота на „мразокршачи“, но и од Канада. Сега фирмите за крстарење нудат луксузни апартмани на бродовите со ресторани и со бањи.
Поради брзиот туристички раст екологистите предупредуваат на влијанието на животната средина. Студијата од 2022 година објавена во часописот "Nature" покажува дека снегот на Антарктикот се топи побрзо поради туристичките посети на континентот. Црниот дим кој излегува од бродовите се таложи на мразот и ја привлекува сончевата светлина, а тоа предизвикува предвремено топење на снегот. Екологистите предупредуваат дека присуството на луѓето предизвикува и пораст на јаглен диоксид во овој дел од планетата. Операторите на бродовите за крстарење велат дека на патниците им даваат совети да не носат никаква храна од надвор и други загадувачки предмети, како и да бидат подалеку од животните за да се спречи пренесувањето на бактерии и вируси, пренесува „Екапија“.
фото freepic