Бизнис
„Макстил“ оствари повисока нето добивка
01.11.2024
„Макстил“ за периодот јануари – септември 2024 година оствари позитивни финансиски резултати искажани во неревидираните поединечни финансиски извештаи. Оствареното производство на дебели лимови во првите три квартали на 2024 во производниот погон Валавница изнесува 216.735 тони што споредено со 215.771т. во истиот период на 2023 претставува зголемување од 0,45%. Споредено со поставениот производен план за првите девет месеци од годинава (221.680т.) претставува намалување од 3%. Оствареното производство на челичанските слабови во извештајниот период е 220.883т. што споредено со 209.938т. во 2023 претставува зголемување од 5%, додека во однос на планираното производство за првите три квартали во годината (194.200т.) претставува зголемување од 13%.
Во овој период се остварени приходи од работење во износ од 6,27 милијарди денари, од кои приходите од продажби како носечка ставка во структурата на вкупните приходи учествуваат со дури 99%. Споредено со истиот период од 2023 остварените приходи од работењето (6,46 милијарди) се пониски за 3%. Во првите девет месеци од работењето остварените расходи изнесуваа 5,65 милијарди денари, од кои трошоците за производство се носечка ставка и во структурата на вкупните расходи учествуваат со 91%. Споредено со истиот период во 2023 година остварените расходи од работењето (5,88 милијарди денари) се пониски за 4%.
Добивката пред оданочување во извештајниот период е 241 милиони денари и е повисока за 23% од остварената во истиот период од 2023, додека нето добивката изнесува 214 милиони денари, повисокa за 25% од остварената во истиот период во минатата година.
Во последниот квартал од годинава не се очекуваат позначајни промени во делот на продажните цени и трошоците за производство.
Тековната 2024 година може да се окарактеризира како тешка година за глобалната побарувачка за челик, во која глобалниот производствен сектор ја продолжи борбата со постојаните спротивставени ветрови како што се опаѓање на куповната моќ на домаќинствата, монетарно затегнување и ескалацијата на геополитичката неизвесност. И покрај тековните предизвици преовладува оптимизам дека глобалната побарувачка за челик ќе влезе во фаза на умерен раст во текот на наредната година. Клучните детерминанти на глобалната побарувачка на челик за наредната година се смета дека ќе бидат напредокот постигнат во делот на стабилизацијата на кинескиот сектор за недвижности, ефективноста на приспособувањето на каматните стапки во поттикнувањето на приватната потрошувачка, деловните инвестиции и траекторијата на трошоците во инфраструктурните проекти посветени на декарбонизација и дигитална трансформација во големите глобални економии, се наведува во информацијата на „Макстил“ доставена до македонската берза.