Бизнис
ВО АКЦИЈА НА ЕВРОПОЛ ЗАПЛЕНЕТА ХРАНА СО ПОМИНАТ РОК НА УПОТРЕБА
24.10.2024
Во акцијата на Европол во повеќе европски земји се запленети околу 22.000 тони храна и 850.000 литри пијалок, поголемиот дел се алкохолни пијалоци со фалсификувани етикети. Во операцијата „OPSON XIII“, која е спроведена од Европол и неколку европски агенции се одземени производи во вредност над 91 милион евра.
Годинава се откриени 11 криминални мрежи и биле издадени 104 налози за апсење, а 278 лица биле пријавени до правосудните органи.
Операцијата има за цел заштита на јавното здравје и безбедноста, како и за разбивање на организираните криминални мрежи кои се насочени кон измами со храна. Најголемиот дел на измами се однесуваат на продавање на храна со изминат рок на употреба.
Осомничените лица успеале да се инфилтрираат во компаниите за одложување на отпадот и на тој начин доаѓале до голема количина на храна која требало да биде уништена.
Датумот за употребата на производите бил бришан и повторно отпечатувале етикета со нов рок на траење, а потоа прехранбените производи ги пуштале во малопродажбата.
Во Шпанија се уапсени четири лица од кои се одземени 120.000 конзерви со туна и 45.000 литри масло. Во Италија се одземени 42 тони масло за јадење, пренесува „Еуроњуз“.
фото freepic