Бизнис
ТУРИСТИЧКИ БУМ ВО ЈАПОНИЈА ПОРАДИ ПОСЛАБИОТ ЈЕН
19.10.2024
Потрошувачката на странските туристи во Јапонија во првите девет месеци годинава достигна рекордно годишно ниво од 39,27 милијарди долари, покажуваат официјалните податоци на Националната туристичка организација.
Туристичкиот бум во Јапонија е последица на слабиот девизен курс на јенот, што им ги намалува трошоците за престој на странските гости. Минатата година беше постигнат претходниот рекорд во остварениот туристички промет во износ од 35,51 милијарди долари.
Туристичката потрошувачка во Јапонија се смета како извоз во националните пресметки. Со тоа туризмот може да биде вториот најголем извозен сектор во Јапонија, по автомобилската индустрија и пред извозот на електронските компоненти.
Секој посетител во Јапонија во просек троши 1.492 долара на своите патувања. Најмногу трошат туристите од Италија, Шпанија и Русија.
Во септември Јапонија ја посетиле 2,87 милиони туристи, а во август 2,93 милиони. Највисок рекорд е постигнат во јули годинава со 3,29 милиони странски туристи.
До септември во Јапонија пристигнале 26,88 милиони туристи, што е повеќе од вкупниот број на посети во 2023 година, пренесува „Срна“.
фото freepic