Бизнис
ВО СЛОВЕНИЈА СЕ ЗГОЛЕМУВА БРОЈОТ НА РАБОТНИЦИ ОД КОСОВО, МАКЕДОНИЈА, ИНДИЈА...
18.10.2024
Бројот на издадени работни дозволи за странски работници во Словенија се зголеми за трипати во однос на 2015 година. Голем скок има кај одобрениот дозволен престој за граѓаните од Косово, Индија, Непал и Бангладеш. Странските работници најмногу се вработуваат во градежништвото и производниот сектор, покажуваат податоците на Заводот за вработување во Словенија.
Во август годинава речиси секој шести вработен во Словенија бил од трети земји. Околу 19.000 странски работници биле од земјите членки на Европската Унија (13 отсто), а 126 илјади (87 отсто) биле од другите земји, од нив најмногу се од поранешните југословенски републики.
Лани бројот на работни дозволи за странци изнесувал 44.700. Бројот на косовските работници во Словенија се зголемил за двапати од 2018 година, а потоа следат работниците од Македонија и од Турција. Странците претежно се ангажираат на помалку квалификувани работни места. Наспроти ова, има многу мал број на барања за добивање на сина карта на ЕУ, која се издава на висококвалификувани работници. Минатата година биле издадени само 319 сини работни дозволи, што се објаснува со послабата конкурентност на словенечките компании за привлекување на високообразовани работници, кои заминуваат во поразвиените економии во ЕУ, пренесува „Сеебиз“.
фото freepic