Бизнис
ГРЧКИОТ ПРЕМИЕР НЕ ГО ЗАГРИЖУВА ПРЕКУМЕРНИОТ ТУРИЗАМ, ЗА НЕГО ЦЕЛТА СЕ ПОГОЛЕМИ ПРИХОДИ
16.10.2024
Речиси седум од десет Грци, односно 67 отсто сметаа дека „сигурно“ или „веројатно“ во земјата постои прекумерен туризам, согласно истражувањето на јавното мислење презентирано на конференцијата за туризам „Reimagine Tourism in Greece“ организирана од весникот „Катимерини“.
Грчкиот премиер Кирјакос Мицотакис посочува дека „Грција нема проблем со прекумерен туризам туку „се соочува со проблеми со голема концентрација на туристи на конкретни, мал број дестинации, неколку месеци во годината“, јави дописничката на МИА од Атина.
Грчкиот премиер изјави дека е важно како во иднина ќе се управува со туристичките бранови, „за да не се соочиме со овој проблем“.
- Навистина, на некои острови во Егејското Море, некои месеци од годината, почнуваме да имаме проблем каде погодена е инфраструктурата на островите. Кога би имале подобра инфраструктура, теоретски би можеле да пречекаме повеќе туристи. Според мене, не постои апсолутен број, апсолутна граница над која не можеме да одиме. Ова, во голема мера зависи од способноста на нашите острови да управуваат со туристичките бранови во однос на отпадот, во однос на водата, во однос на сообраќајот што може да се создаде на патиштата. Значи, теоретски, ако подобриме дел од нашата инфраструктура, би можеле да примиме повеќе посетители, објасни Мицотакис.
Посочи дека прашањето е дали сакаат повеќе туристи или во основа сакаат туристи кои ќе можат да трошат повеќе пари во земјата и дали мерило за успешноста на една туристичка година е апсолутниот број на пристигнувања или се приходите. Според него, целта се приходите, и како што рече повеќе го интересира Грција да има рекорд во туристичките приходи.
Извор МИА
фото freepic