Бизнис
ПО 19 ГОДИНИ ВО ХРВАТСКА СЕ ПУШТА НАЈДОЛГО ГРАДЕНА АВТОПАТСКА ДЕЛНИЦА
13.10.2024
Во Хрватска по 18,5 години изградба конечно ќе биде пуштен во сообраќај целиот автопат А11 Загреб - Сисак. Имено, на крајот на октомври ќе биде пуштена во сообраќај последната делница од 11 километри од автопатот од Лекеник до Сисак.
Самата делница беше завршена на крајот на јули, но за да биде пуштена во сообраќај требаше да се изгради поврзувачки пат од автопатот до државниот пат во градот Ступно на државниот пат Д36 заедно со интегралната клучка Ступно. Самиот поврзувачки пат е долг околу 900 метри, а со краците на клучката должината е 1,4 километри.
Дарко Шошиќ, директор на Одделението за подготовка, изградба и реконструкција во хрватските патишта, изјавил дека техничкиот преглед е закажан за 14 и 15 октомври и оти не се очекуваат значителни приговори. Набргу потоа треба да биде издадена и употребната дозвола, а потоа и пуштање во сообраќај, објави „Пословни дневник“.