Бизнис
ОВАА ЕСЕН ОГРЕВНОТО ДРВО ВО СРБИЈА СЕ ПРОДАВА ПО ПОНИСКИ ЦЕНИ ОД ЛАНСКИТЕ!
12.10.2024
Цените на дрвото за огрев во Србија пред почетокот на грејната сезона се намалени во однос на истиот период лани. Цената на дрвата годинава е различна во градовите во Србија, но во Смедерево еден кубик од даб или бука се продава за 8.000 динари (околу 70 евра), а со сечење и средување на дрвата се продаваат за 8.500 динари.
Минатата година кубик од даб и бука се продаваше за 10.000 динари, а метар просторен со сечени дрва на палета се продаваше за 18.000 динари. Во Смедерево лани цената изнесуваше 9.000 динари.
Жителите во регионот на Чачак не паметат кога огревното дрво било поевтино од оваа есен. Сегашната цена на метар кубен буково дрво е околу 7.000 динари. Една година претходно за кубен метар огревно дрво требаше да се издвојат и до 2.000 динари повеќе. Лани огревното дрво беше за најмалку 25 отсто поскапо од оваа есен.
Минатата зима беше прилично блага, така што речиси сите користеа околу 30 до 40 отсто помалку огревно дрво отколку во претходните години. Сега, минатогодишните залихи им овозможуваат на купувачите да купат помалку огревно дрво и затоа продажбата е послаба.
Побарувачката за дрво во Србија е прилично слаба, па тоа ја турна цената надолу. Побарувачката е слаба од неколку причини, пред се, затоа што многу домаќинства се преориентираа на греење на котли на пелети, а некои поставија топлински пумпи, па веќе не им требаат дрва, велат продавачите на огревно дрво во Србија, пренесуваат српските медиуми.
фото freepic