Бизнис
ВКЛУЧУВАЊЕ НА МЛАДИТЕ ВО КРЕИРАЊЕ НА ПОЛИТИКИТЕ ЗА НАМАЛУВАЊЕ НА РИЗИЦИТЕ ОД КАТАСТРОФИ
08.10.2024г
Искористување на потенцијалот на образовниот сектор за намалување на ризикот од катастрофи кај децата на училишна возраст, зголемување на отпорноста на училиштата и образовните институции во случај на непогоди и нивна вклученост во системите за рано предупредување како и вклученост на младите во креирањето на политиките за намалување на ризиците од катастрофи, се дел од клучните поенти на денешниот дијалог кој се одржа во собраниската сала „Борис Трајковски“ во организација на УНДП, Собранието на република Северна Македонија и амбасадата на Швајцарија.
Настанот беше дел од серијата активности кои ги реализира Програмата за развој на Обединетите нации за одбележување на меѓународниот ден за намалување на ризиците од катастрофи, 13-ти октомври, поврзани и со проектот за подобрување на отпорноста кон поплавите во Полошкиот регион, финансиран од Швајцарија, кој УНДП го имплементира во партнерство со Министерството за животна средина и просторно планирање.
Оваа година меѓународниот ден за намалување на ризиците од катастрофи се одбележува под мотото „Зајакнување на новите генерации за отпорна иднина“.
„Ангажманот на младите во намалувањето на ризикот од катастрофи не е само суштински за градење на отпорни заедници, туку и ја потикнува помладата генерација во градењето на лидерски вештини и способности. Еден од првите чекори во ангажирањето на младите е преку образованието. Училиштата и универзитетите можат да вклучат управување со ризици од катастрофи во нивните наставни програми, учејќи ги учениците за ризиците специфични за нивните заедници и како да реагираат ефективно“, изјави претседателот на Собранието, Африм Гаши.
Постојаниот претставник на УНДП ги потенцираше активностите кои се спроведуваат на терен за зголемување на подготвеноста за одговор при катастрофи.
„Програмата за развој на Обединетите нации, заедно со локалната власт, ДЗС, ЦУК, пожарникарите, полицијата и Црвениот крст, во Полошкиот регион досега организираше 8 симулациски вежби за евакуација при катастрофи, во кои беа евакуирани над 2000 ученици. Подготвивме и дистрибуиравме и едукативни материјали прилагодени на возраста на учениците преку кои тие на интересен начин учат како да останат безбедни при различни непогоди“, рече Григорјан.
„Швајцарија инвестираше над 12 милиони швајцарски франци за зајакнување на отпорноста кон поплавите и заштита на локалните заедници во Полошкиот регион. Овој долгоречен процес е сложен, скап и за негов успех, неопходна е посветеноста на владата, општините, институциите и најважно од се – граѓаните, особено младите, кои наскоро ќе ја преземат лидерската функција“, изјави Кармен Тоенинсен, регионален советник за води и животна средина во амбасадата на Швајцарија на РСМ.
Во дијалогот во Собранието учествуваа и Марина Димовска, генерална секретарка на Собранието, како и претседателката на клубот на млади пратеници, Драгана Бојковска и претставници на комисиите за образование, наука и спорт; комисијата за социјална политика, демографија и млади и националната координаторка за млади во Црвениот крст.