Бизнис
ХРВАТСКА ГО НАПУШТА ГЛОМАЗНИОТ СИСТЕМ НА НАПЛАТНИ ПУНКТОВИ ЗА ПАТАРИНИ, новиот систем за електронска наплата на патарини во Хрватска ќе биде воведен за две години
24.09.2024
Хрватското јавно претпријатие за автопатишта ХАЦ потпиша договори со фирми од Словачка и Чешка за воведување на нов систем на наплата на патарини. Новиот систем ќе биде воведен најдоцна за 24 месеци, а патарината ќе може да се плаќа единствено со исчитување на регистерските ознаки на автомобилите. Системот ЕНЦ ќе биде задолжителен за возилата потешки од 3,5 тони, а за сите други ќе се користи системот за препознавање на регистерските ознаки. Ова ќе овозможи слободен премин на возилата без застанување, ќе го намали времето на патување и ќе ги намали и емисијата на штетни гасови, пренесува „Бизнис.ба“.
Преку веб страна корисникот ја внесува регистерската ознака на возилото и податоците од картичката која ќе се користи за покривање на трошоците за патарините. Постои и можност за плаќање на патарината и преку апликација на мобилен телефон.
Странските возачи односно туристите ќе може брзо да се регистрираат преку бројни канали на продажба на картичките за патарини, а ЕНЦ системот ќе може да се симне и преку веб портал. Овој нов систем на наплата на патарините во Хрватска ќе биде усогласен со европскиот систем на наплата на патарините.
Со почетокот на примената на новиот систем ќе бидат целосно отстранети наплатните пунктови на сегашните патарини. Дел од вработените ќе бидат преквалификувани на нови работни места, а дел ќе заминат со природен одлив на работници, велат од ХАЦ.
Илустрација „Бизнис.ба“