Бизнис
БРАН НА ЗАТВОРАЊА НА БРИТАНСКИТЕ ПАБОВИ, високата инфлација ги принуди граѓаните во Англија и Велс да трошат помалку во пабовите
24.09.2024
Во Англија и Велс продолжува серијата на затворање на британските пабови и од јануари до јуни биле затворени 305 објекти, покажале податоците на компанијата за недвижности „Алтус груп“, која се повикува на информации од владата на Велика Британија. Економистите предупредуваат дека зголемувањето на данокот во 2025 година ќе им го отежне работењето на познатите угостителски објекти во Велика Британија. Некои од објектите се урнати, а некои се пренаменети за станови, канцеларии или градинки. Затворањето на пабовите е изразено во северозападна Англија, пишува „Шпигл“.
Бројот на меаните постојано е во опаѓање, само од април 2023 до март 2024 се затворени вкупно 472 барови. Бројот на пабови во Англија и Велс во јуни годинава се намали на 39.096. Некои од пабовите се празни или се огласени за продажба.
Причината за бранот затворање на британските пабови е високата инфлација и зголемените трошоци за енергија и работна сила, а истовремено и гостите трошеле помалку за пиење. Најавите за продолжување на забраната за пушење во градините предизвикува дополнителна неизвесност кај сопствениците на пабови, пренесува РТС.
фото freepic