Бизнис
ИНСТИТУТ ЗА ИЗВОЗ ПРИ СТОПАНСКАТА КОМОРА НА СЕВЕРНА МАКЕДОНИЈА
Економија и бизнис | печатено издание | 15 септември 2024г.
ШТО ПРЕТСТАВУВА ИНСТИТУТОТ ЗА ИЗВОЗ?
Како дел од концептот „Комора на иднината“, Стопанската комора на Северна Македонија во својот фокус на работење, покрај другото, ги издигнува барањата и потребите на извозно ориентираните компании за пристап до соодветни знаења, вештини и експертиза во областа на надворешното трговско работење преку основање на Институт за извоз. Институтот е формиран во услови на недостиг на професионално тело, чии заложби ќе бидат насочени кон поддршка на градењето на кадровски капацитети на македонските извозно ориентирани компании.
Институтот за извоз е формирана професионална, услужна алатка за поддршка на извозно ориентираните компании, која за потребите на компаниите веќе почна да нуди обуки и работилници за развивање на кадровските капацитети, со знаења и вештини потребни за реализација на извозните активности. Дополнително Институтот, во рамките на своето дејствување, за потребите на компаниите ќе изготвува анализи и истражувања со податоци за извозна конкурентност на целни странски пазари, податоци за царинска и за даночна политика, нецарински бариери и сл.
Основањето на Институтот за извоз во рамките на Стопанската комора на Северна Македонија се реализира како дел од Проектот за поддршка на приватниот сектор за регионална интеграција (ПСРИСА), кој го реализира Комората во партнерство со Агенција за меѓународен развој на САД.
Цели и задачи
Институтот за извоз е формиран со цел преземање соодветни активности во насока на поддршка на извозно ориентираните компании, и тоа за:
- Поттикнување на македонските компании за започнување на извозни активности и настап на странски пазари.
- Јакнење на кадровските капацитети на извозно ориентираните компании со знаења и со вештини кои се во функција на раст, на развој и на интернационализација на бизнисот.
- Сервис кој овозможува пристап до специфични податоци од релевантни извори од доменот на надворешното трговско работење, како и изработка на анализи за одреден пазар/земја која е во фокус на интерес на компанијата.
ДВЕ ЦЕЛИНИ ПРЕКУ КОИ ДЕЈСТВУВА ИНСТИТУТОТ
1. Тренинг центар (Академија за извоз), чиј фокус e развивање на човечките ресурси во областа на надворешното трговско работење преку испорака на обуки и модули на теми кои се од големо значење за организирање на извозното работење и
2. Центар за истражувања и анализи (Аналитички центар), преку кој ќе се испорачува стручна експертиза за поддршка на компаниите и консултантски услуги за подготовка на компании за настап на странски пазари преку обезбедување на анализи кои ќе го олеснат пристапот на компаниите до информации кои влијаат врз носењето на деловни одлуки.
Активности на Тренинг центарот (Академија за извоз)
Тренинг центарот (Академија за извоз) во рамките на Институтот за извоз веќе испорача две програми од кои првата ќе биде наменета за компании кои сакаат да започнат извозни активности, но немаат доволно знаења за да го направат тоа, додека втората, пак, ќе биде наменета за постојни извозници кои сакаат да го унапредат своето работење и да го прошират опсегот на земји/пазари на кои ќе ги пласираат своите производи.
Активности на Центарот за истражувања и анализи (Аналитички центар)
Центарот за истражувања и анализи (Аналитички центар) во рамките на Институтот за извоз е задолжен за:
1. Прибирање, обработка и анализа на податоци (од официјални извори и со спроведување на анкети) во функција на утврдување на потребите на македонските извозно ориентирани компании на системски начин.
2. Анализи и обезбедување на информации насочени кон индивидуални компании кои се извозно ориентирани (или компании кои се потенцијални извозници).
3. Креирање на база на извозни компании во Република Северна Македонија, подготовка на упатства за извозните компании („Подгответе се за извоз − како да станете извозник“), кои вклучуваат неоходни информации за настап на регионалните и на меѓународните странски пазари, водичи за пристап до финансии за извоз и др.
Потребите на извозно ориентираните компании, со цел предлагање на политики, стратегии и мерки за подобрување на деловното окружување во кое функционираат, се утврдуваат на годишно ниво преку ЛАЈМ (LIME)-анкетен софтвер, за чие користење вработените во Аналитичкиот центар во рамките на Институтот за извоз се соодветно едуцирани.
Анкетните истражувања кои се спроведуваат од овој центар вклучуваат најмалку едно годишно анкетно истражување, кое се спроведува најдоцна до септември во тековната година, со цел предлагање на политики и на мерки за олеснување на надворешното трговско работење и подобрување на деловното окружување за извозните компании.
Резултатите од овие анализи ќе бидат разгледани, оценети и дискутирани од Националниот совет за извоз за креирање предлози на политики и на мерки за зголемување на конкурентноста на извозните компании за следната година (барања за вклучување на одредени мерки во различни владини програми за поддршка на извозот, барања за промена на регулативата и слично).
Покрај анкетите, истражувањата и предлагањето на политики и на мерки во делот на системските прашања кои се однесуваат на извозните компании, Аналитичкиот центар во рамките на Институтот за извоз ќе биде задолжен и за обезбедување на услуги на индивидуални извозни компании или на потенцијални извозници кои се фокусирани на соодветни анализи и информации за:
– конкретен странски пазар (регулатива, услови за извоз и сл.) со цел олеснување на настапот на компанијата;
– национални и меѓународни програми за финансиска поддршка/грантови;
– трговски контакти и потенцијални деловни соработници на конкретен странски пазар и
– услуги за извозна промоција на компаниите со организирани настапи на меѓународни саеми, Б2Б средби, организирање на купувачки мисии и други форми на промоција.
Обуките почнуваат од 23 септември, ќе се реализираат во следните месеци согласно потребите на компаниите и расположливоста на капацитетите преку следните две прогрaми и единаесет неколкудневни обуки.
Програма: „Како да започнете со извоз на меѓународни пазари“
Програма „Извозен менаџмент (Еxport Management)“
