Бизнис
ГРЦИТЕ СЕ ЖАЛАТ НА ВИСОКИТЕ ЦЕНИ, НА ИНФЛАЦИЈА ОД 2,7 ОТСТО! поскапувањата на цените е на првото место од грижите за третина од граѓаните во Грција
19.09.2024
Поскапувањето на цените, ниските приходи и големите трошоци, како и економијата, се трите најголеми проблеми за Грците, согласно резултатите од истражувањето на јавното мислење на агенцијата „Pulse“ за грчката телевизија „Скај“, јави дописничката на МИА од Атина.
Кај анкетираните, поделено е мислењето за мерките што грчкиот премиер Кирјакос Мицотакис ги соопшти на Меѓународниот саем во Солун пред десет дена, односно 45 отсто ги оценуваат како позитивни, а 43 проценти рекле дека се во погрешна насока.
На прашањето која тема најмногу ги загрижува, поскапувањата на цените е на првото место со 34,5 проценти, приходите и трошоците со 18 отсто се на втората позиција, а трета е состојбата на економијата со 15 проценти.
Во однос на рејтингот на партиите, Нова демократија е стабилна на првата позиција со 24 отсто, ПАСОК е втора со 13 проценти, а СИРИЗА добива десет отсто.
Истражувањето на јавното мислење на агенцијата „Pulse“ за грчката телевизија „Скај“ било спроведено во периодот од 13 до 16 септември со анкетирано 1.301 лице со право на глас.
Годишната инфлација во Грција во јули годинава се зголемила на 2,7 отсто, наспроти 2,3 проценти еден месец претходно и 2,5 отсто за истиот период во 2023 година, зголемување што, според официјалните податоците од грчката служба за статистика, се должи на поскапувањата на цените на дел од продуктите и услугите, како што се маслиновото масло и природниот гас.
За една година, од јули 2023 до јули 2024 година цената на маслиновото масло се зголемила за 56,7 проценти, на природниот гас за 23,4 отсто, а за прехранбените продукти, зголемени се цените на лебот, месото, рибите, зеленчукот, шеќерот и слатките производи.
Од друга страна намалување на цените има кај брашното, млечните производи, јајцата и овошјето.
Во однос на цената на струјата, за една година е намалена за 1,8 отсто, а во споредба со јуни, била поскапа за 9,5 проценти.
фото freepic