Бизнис
СРБИЈА НАСКОРО ЌЕ ИМА 164 ПОЛНАЧИ ЗА Е-АВТОМОБИЛИ, во земјата се возат 3.629 електрични возила
13.09.2024
Во Србија до април 2025 година на сите автопатишта во земјата ќе има 164 полначи за електрични автомобили, а досега има само осум. Од два милиона регистрирани возила во Србија има само 3.629 електрични возила, од нив околу 30 отсто се купени во минатата година. За зголеменото интересирање кај српските граѓани за е-возила придонесе и државната субвенција од 5.000 евра.
Српскиот министер за градежништво, сообраќај и инфраструктура Горан Весиќ информираше дека годинава до крајот на јули се регистрирани 152 патнички и 107 лесни товарни електрични возила.
- Мора да постои соодветна инфраструктура за да се купуваат електрични автомобили. Србија е транзитна земја, годинава очекуваме 48 милијарди динари од патарини. Се повеќе има електрични автомобили и мора да се прилагодуваме на потребите на граѓаните, изјави Весиќ.
Во Србија во тек се поставуваат 10 супербрзи електрични полначи на автопатите. Исто така, се планира на секој купувач на електричен автомобил да се даде поволна можност за инсталирање на сопствен полнач во домовите, пренесуваат српските медиуми.
фото freepic