Бизнис
Григорјан: Со исполнување на Целите за одржлив развој компаниите го јакнат бизнисот и придонесуваат за поправедно општество
Компаниите и целите за одржлив развој: трасирање на патот кон иднината
Економија и бизнис | печатено издание | 01 септември 2024г.
Гледајќи го приватниот сектор како централен чинител во развојот, глобалната мрежа на УНДП има цел да создаде поволна средина за бизнисите да придонесат кон постигнување на Агендата 2030 и реализација на Целите за одржлив развој. Програмата за развој на Обединетите нации во Република Северна Македонија со години наназад дава поддршка и на располагање е нашата експертиза за интегрирана и за заедничка акција за подобро остварување на овие цели.
Целите за одржлив развој за компаниите може да бидат многу опипливи, почнувајќи од создавање работни места и правични плати до борба против сиромаштијата; борба против родовата дискриминација и воведување инклузивни политики; поддршка на истражување и на иновации; користење на обновливите извори на енергија за намалување на нивните емисии и на потрошувачката на енергија кон подобра животна средина.
Сето ова е цврсто поврзано со нивното известување за перформансите на EСГ, што го прави видлив нивниот придонес во општеството во кое живееме. Покрај негувањето на културата на одговорност и на свесност, ги подобрува транспарентноста и отчетноста, гради доверба со засегнатите страни, може да доведе до подобрена оперативна ефикасност и придонесува за заштеда на трошоци.
На глобално ниво, известувањето за СДГ станува престиж за компаниите кои пласираат такви информации, дури и на нивните производи, со што ја промовираат нивната општествена одговорност. Дополнително, ваквото нефинансиско известување е предуслов за бизнисите кои се заинтересирани да излезат на меѓународните пазари или да привлечат странски инвестиции. За влијанието на инвестицијата и услов за меѓународна соработка станува следново прашање: „Што прават моите пари за почиста планета и еднакви можности за сите?“
Прашањето е многу релевантно за македонските компании кои ја препознаваат нивната одговорност и важност за спроведување на одговорни политики. Како резултат на тоа, воведувањето на ваквото известување се зголемува од година во година, следејќи ги очекувањата на светскиот тренд дека приватниот сектор ќе придонесе 70 % во напорите за постигнување на ЦОР до 2030 година.