Бизнис
ЗАДОЛЖИТЕЛНО ОБЕЛЕЖУВАЊЕ НА ГМО ХРАНАТА, бараат од над 370 прехранбени компании од 16 земји во ЕУ
04.09.2024
Повеќе од 370 прехранбени и компании за малопродажба од 16 земји во Европската Унија денеска ги повикаа министрите за земјоделство да ја поддржат иницијативата за задолжително означување на генетски модифицираната храна (ГМО).
Европската комисија лани предложи да се ублажат одредбите за генетскиот инжинеринг, а Европскиот парламент се согласи за поблаги прописи, но побара обележување на сите прехранбени производи со ГМО на рафтовите во европските супермаркети, објави ДПА.
- Купувачите сакаат сами да одлучуваат дали сакаат да имаат „технологија“ во своите чинии. Ова наметнува јасни правила за коегзистенција во земјоделството, целосна транспарентност и декларација на сите производи, изјави Гетц Е. Рехн, од организацијата Алнатуре.
Германското здружение за храна без генетски инжинеринг (ВЛОГ) ја координираше активноста за доставување на писмото до министерот за земјоделство на Унгарија, која претседава со Европската Унија. Во претходното отворено писмо до министрите за земјоделство на ЕУ се бараше да се „задржи обележувањето и слободата на избор“ во случај на прашањето за генетско модифицирана храна. Критичарите за користење на ГМО храна ги нагласуваат ризиците за јавното здравје и за околината, пренесува „Индекс“.
фото freepic