Бизнис
СЕ МЕНУВА КОНЦЕПТОТ ЗА СУБЕНЦИОНИРАЊЕ НА ПАТНИЦИ ВО АВИОСООБРАЌАЈОТ, ќе се субвенционираат дестинации и дојдовни патници
29.08.2024
Министерството за транспорт и врски следната недела ќе објави тендер за пријавување на авио компании кои ќе можат да користат субвенции за превезените патници од аеродромите во Скопје и Охрид. Ова е дел од пакетот мерки што Владата на Македонија ги донесе за зголемување на бројот на патници во авиосообраќајот.
- Македонија од лидер во воздушниот сообраќај се соочува со намалување на бројот на летови и на бројот на дестинации и патници кои доаѓаат во земјата, изјави министерот за транспорт и врски Александар Николоски, на денешната прес-конференција.
Очекувањата на Владата се со новите мерки, во 2025 година бројот на патници на аеродромите во земјата да се зголемат за 200 илјади, а тој број во наредните години да продолжи да расте.
Новата програма за субвенионирање ќе се спроведува за периодот од 1 јануари 2025 до 31 декември 2027, а за тоа се планира да се потрошат вкупно 375 милиони денари или зголемување од 63 милиони денари (околу еден милион евра).
Исто така, се менуваат и условите за конкурирање за субвенциите и тоа можат да бидат авио компании, кои во 2023 година превезле најмалку најмалку пет милиони патници и кои оствариле десет милиона евра профит. Тоа значи, Македонија е заинтересирана за сериозни авио компании, појасни министерот Николоски.
Како новина се предвидува и продолжувањето на рокот на опслужување на авио линијата за времето кога се исплаќани субвенциите.
Најголема новина е тоа што нема да се субвенционираат авиокомопании, туку ќе се субвенционираат дестинации. На овој начин се избегнува сегашната пракса да конкурираат една или две компании за сите дестинации. Повикот за конкурирање е за сите компании за секоја посебна дестинација.
Од следната година ќе се напушти досегашната пракса за субвенционирање за патник во заминување од Македонија и ќе се субвенционира патник на доаѓање во Македонија, со што ќе се зголеми бројот на туристите во земјата. Се зголемува и финансиската поддршка од сегашните седум евра на девет евра по патник од аеродромот од Скопје и од сегашните 4,5 евра по патник од Охрид на 12 евра за превезен патник од охрискиот аеродром. Новината ќе биде и проширување на дестинациите и надвор од земјите од Европската Унија.