Бизнис
СИНДИКАТИТЕ ВО СРБИЈА БАРААТ МИНИМАЛНА ПЛАТА ОД 528 ЕВРА, Вучиќ најавува 11.527 евра БДП по жител
12.08.2024
Владата на Србија и претставиници на српските синдикати и Унијата на работодавачи на 15 август ќе почнат преговори за зголемување на минималната плата во земјата. Од репрезентативниот синдикат во Србија предлагаат мининалната плата да се зголеми од 47.000 динари (околу 400 евра) на 61.858 динари (околу 528 евра).
Претседателот на Србија Александар Вучиќ, вчера за српските медиуми, изјави дека во преговорите за висината на минималната плата ќе се „влезе максимално во интерес на работниците кои примаат минимална плата“.
- Очекуваме БДП за годинава да изнесува 11.527 евра по глава на жител. Важно е да им излеземе во пресрет на граѓаните со минимални плати, а тие се се помалку. Нивниот број е околу 99.000 работници, изјави Вучиќ.
Просечната бруто плата во Србија за мај 2024 година изнесува 138.332 динари (1.182 евра), додека просечната нето заработувачка без даноци и придонеси изнесува 100.170 динари (855 евра).
Просечната нето плата во периодот јануари-мај 2024 година во однос на истиот период лани, номинално е повисока за 15,2 отсто, а реално е повисока за 9,4 отсто.
Медијалната нето плата за мај годинава изнесува 77.571 динар (662 евра), а оваа плата ја примале 50 отсто од вработените во земјата, објави Државниот завод за статистика на Србија.
фото freepic