Управата на пристаништето Драч, која е оператор на најголемото албанско пристаниште, распиша тенедeр за првата фаза за изградба на ново пристаниште во областа Порто Романо, северозападно од Драч. Буџетот за првата фаза за проектот се проценува на 39,3 милијарди леки (392 милиони евра). Работите од оваа фаза мора да бидат завршени за 40 месеци, соопшти агенцијата ДПА.

За учество на тендерот веќе изразиле интересирање 15 меѓународни компании. Првата фаза вклучува изградба на контејнерски терминал, пристанишна брана, пристапни патишта и друга пропратна инфраструктура.

На почетокот, за  новиот терминал за контејнери ќе се користат мобилни дигалки. Со зголемување на истоварот на контејнери ќе се користи опрема за портални дигалки од брод до брегот.

Новото пристаниште треба да служи како база на брегот за пристанишни објекти кои ќе бидат користени од Косово и од Македонија, а кои ќе бидат поврзани со патна и железничка мрежа.

Албанската влада во целост ќе ја финансира изградбата на новото пристаниште, изјави албанскиот премиер Еди Рама. По преселувањето на постојното пристаниште во јужниот дел на Драч, ќе почне изградбата на нов станбен и поморски центар вреден две милијарди евра, кој ќе биде финансиран од реномирана компанија за развој на недвижности од ОАР, пренесува „Бизнис.ба“.

фото freepic