Бизнис
ИТАЛИЈА ЈА УКИНУВА ДАНОЧНАТА „ФУДБАЛЕРСКА ШЕМА“, богатите странци ќе плаќаат повисок паушален данок
08.08.2024
Италија ја зголеми единствената даночна стапка на приходите од странство на новите резиденти, со што зададе финансиски удар на богатите странци кои сакаат да ја избегнат можноста од плаќање на повисоки даноци во другите делови на Европа. Италијанската влада во средата го одобри зголемувањето на годишниот паушален данок за странците на 200.000 евра од досегашните сто илјади евра, пренесува „Фајненшел тајмс“.
Даночните олеснувања во Италија, беа привлечни за богатите поединци, посебно за деловната заедница во Милано, која покажа поголемо интересирање за вложување во недвижности. Новите приходи од даноците треба да го намалат буџетскиот дефицит на Италија, на што беше предупредена од официјалните служби на ЕУ во Брисел.
Италија се соочува со буџетски дефицит кој достигна 7,4 отсто од бруто домашниот производ, што е над зацртаната цел на Унијата тој да изнесува три отсто од БДП.
Прогнозите за годинава се дека буџетскиот дефицит ќе се намали на 4,4 отсто, што ги надминува фискалните лимити поставени од Брисел. Во јули годинава ЕУ почна процедура за прекумерно буџетско финансирање и побара од Рим до крајот на септември да поднесе среднорочен план за фискално прилагодување.
Досегашната даночна програма која во Италија е позната како „фудбалерска шема“ опфаќаше 2.730 мултимилионери, кои се доселиле во Италија, главно во регионот на Милано. Локалните жителите на овој град беа против даночните поволности за богатите, поради растот на цените на недвижностите за 43 отсто во последните пет години и за пораст на кириите за речиси 20 отсто во последните две години, пренесува Б92.
фото freepic