Бизнис
ПЕКАБЕСКО СО ПОЗИТИВЕН ФИНАНСИСКИ РЕЗУЛТАТ, компанијата оствари раст на приходите од 10 отсто
07.08.2024
Пекабеско АД за периодот јануари-јуни 2024 оствари позитивен консолидиран финансиски резултат искажан во неревидираниот Биланс на Успех, се наведува во Образложението кон неревидираните консолидирани финансиски извештаи за наведениот период што компанијата го достави до Македонската берза.
Остварените вкупни консолидирани приходи од работењето во периодот јануари-јуни 2024 година изнесуваат 2.735 милиони денари. Во споредба со остварените приходи во истиот период во 2023 година бележат зголемување од 10 отсто. Во структурата на вкупните приходи најголемо учество од 99 отсто, имаат приходите остварени со продажба на готови производи, стоки и услуги, кои во споредба со остварените во 2023 година бележат зголемување од 10 отсто. Остварените вкупни консолидирани расходи во истиот период изнесуваат 2.663 милиони денари и се зголемени за 9 отсто во однос на 2023 година.
Вкупните консолидирани инвестиции во основни средства во 2024 година изнесуваат 8.4 милиони. Инвестициите се главно во производствена опрема и транспортни средства. Обврските по кредити на 30.06.2024 година изнесува 214 милиони денари и се на исто ниво со крајот од минатата година.
Бројот на вработени во Пекабеско на крајот на јуни изнесува 419 или за осум помалку вработени од минатата година
Целокупното работење на компанијата во првата половина од годината е согласно планираните резултати, а ликвидноста на компанијата е задоволителна. Нема репрограмирање на обврските кон финансиските институции, ни кон добавувачите во земјата и странство. Залихите на готови производи, стоки и репроматеријали се поставени на соодветно ниво, согласно економската ситуација во земјата и странство, се наведува во Образложението за остварените резултати кое е доставено до Македонската берза.