Бизнис
Катастрофален род на пченица во Франција, светските цени на лебното жито се стабилни
07.08.2024
Производството на пченица во Франција во сезоната 2024/25 може да се намали на 25,2 милиони тони, што е за 27 отсто помалку во однос на петгодишниот просек, објави агенцијата за аналитика Аргус.
Непрекинатите дождови, недостигот на сонце и ниските температури, кои ги поттикнаа болестите на пченицата, се одразија на приносот и квалитетот на годинашниот род во повеќето региони во Франција.
Ваква слаба жетва на пченица во Франција последен пат била забележана во 1983 година, кога бил остварен принос од 24,5 милиони тони.
Француските земјоделци минатата недела ја повикаа владата да одобри финансиска помош поради катастрофалната жетва.
Екстремно лошите временски услови во Европа негативно се одразија на родот на житните култури, бидејќи во северозападните делови беа забележани обилни врнежи, а на истокот имаше високи температури и суша.
Светските цени на пченицата на стоковната берза во Чикаго и покрај песимистичките резултати од жетвата во Франција и помалиот род во Русија се на ниво на четворогодишниот минимум, бидејќи пазарот е добро снабден со лебно жито од САД, пренесува „Еуроњуз“.
фото freepic“