Бизнис
ДЕКАРБОНИЗАЦИЈА – КЛИМАТСКИ ПРОМЕНИ – НОВИ ТРОШОЦИ ЗА БИЗНИСОТ
Економија и бизнис | печатено издание | 05 јули 2024г.
Климатските промени и заштитата на животната средина сè повеќе се ставаат во спрега со бизнисот. А зошто со бизнисот?
Бројките говорат дека климатските промени настануваат поради ефектот на стаклена градина кој се создава од емисиите на стакленички гасови, а тие се: јаглерод диоксид (СО2), метан (СН4), азотен оксид (N2H) и флуорни (F) гасови, а најголемо учество во ефектот на стаклена градина има СО2, околу 75 %. Тој се емитува во атмосферата при согорување на фосилните горива: јаглен, нафта и природен гас.
Главна цел во борбата против климатските промени е намалување на емисиите на СО2 и токму тоа се нарекува декарбонизација. Главна цел на процесот на декарбонизација е премин од фосилни горива кон обновливи извори на енергија (сонце, ветер и биомаса) или т.н. чиста енергија, а најголем дел на емисиите на стакленички гасови доаѓаат од енергетиката и од тешката индустрија.
Оваа енергетска транзиција не е едноставна работа и ќе трае неколку децении при што се потребни и вложувања на големи финансиски средства.
За побогатите (развиените) земји е полесно да ги обезбедат тие инвестиции. Но, за земјите во развој тоа е поголем товар поради помалиот економски потенцијал, па затоа им е потребна финансиска помош. Според еден од поновите извештаи на Меѓународната агенција за енергија (IEA), годишните инвестиции во чиста енергија во земјите во развој и во оние со забрзана економија мора да скокнат од 770 милијарди американски долари оваа година на 2 800 милијарди американски долари до почетокот на 2030 г. за да му овозможат на светот да ги исполни поставените цели за одржлива енергија и да ги држи на повидок климатските цели од Парискиот договор. Климатските промени наметнуваат промени во нашето секојдневно живеење, но и во секојдневното работење на компаниите. Тие ќе мора да ги следат препораките за премин кон користење чиста енергија. Во спротивно, разни временски и други видови катастрофи ќе станат наша секојдневна реалност.
Фирмите, но и државите ќе треба да одлучат како ќе живееме, сигурно и скапо или неизвесно и евтино.
Стопанската комора е препознаена како институција партнер на меѓународна финансиска организација која ќе поддржи изработка на веб-платформа – Патоказ за декарбонизација. Освен општи информации за декарбонизација, оваа платформа ќе содржи и:
» добри практики на компаниите;
» информации за кредитни линии и пристап до финансии;
» информации за обуки, за прописи, за новини во ЕУ, во ЦБАМ, во системот за тргување со емисии на CO2.
Платформата ќе биде и простор за дополнително промовирање на активности, односно место за објавување на обуките и на тренинзите во организација на Комората на тема декарбонизација, но и добри практики на компании те и нивно препознавање.
Веќе во текот на месец јули 2024 година се организираат презентации на кредитните линии, а првата во низата презентации ќе биде со акцент за поддршка на фотоволтаични системи и на батериски системи.