Бизнис
По воздржаноста од Германија, ЕУ е подготвена за воведување царини на кинески е-автомобили!
05.08.2024
Државите членки на Европската Унија најверојатно ќе се согласат за воведување на предложените царини на кинески електрични возила во ноември.
- Јасно е дека државите членки ја осознаваат потребата за да се заштити автомобилската индустрија на ЕУ, затоа што постои ризик од штета. Учеството на кинеските електрични автомобили на европскиот пазар постојано расте. Постојат субвенции од Кина, а тоа е проблем што секако треба да се реши, изјави Валдис Домбровскис, европскиот комесар за трговија.
Претходно, Кина силно реагираше на најавата од Брисел за воведување на царини од 37,6 отсто. Кинескиот министер за трговија Ванг Венто понуди разговори со Европската комисија, но официјалните лица од двете страни појаснуваат дека тие средби биле насочени кон разгледување на методологијата за воведување на царините, а не за изнаоѓање начин за решавање на спорот.
Земјите од ЕУ кон крајот на октомври ќе гласа за предлогот за кинеските царини, а истиот ќе стапи на сила во ноември. Германија јавно ги критикуваше воведувањето на царини, а во јули баше воздржана на советодавното гласање, кога четири држави членки гласаа против царините.
фото freepic