Бизнис
Рестораните на хрватското приморје се прескапи и за гостите од Англија и Германија!
04.08.2024
Првите неофицијални бројки за јули велат дека во Хрватска се регистрирани околу пет отсто помалку странски туристи, a од Германија, кој е најважен пазар за хрватскиот туристички сектор , пристигнале речиси десет отсто помалку туристи од минатата година. Во исто време, Здружението на даватели на угостителство при Хрватската стопанска комора излезе со првите податоци за падот на прометот во угостителските објекти на Јадранот. Бројките на крајбрежјето се многу пониски од хрватскиот просек.
Од Даночната управа на Хрватска велат дека во јули годинава износот на издадените сметки во угостителските објекти се за шест отсто повисоки во однос на лани, а има и 17 отсто повеќе издадени фискални сметки. Но, Јелена Табак, претседателката на Здружението на угостителите, вели дека бројките за остварениот промет во угостителските објекти на приморјето се значително полоши. Анкетата меѓу хрватските угостители покажува дека минатиот месец имале просечно намалувањее на приходите за 20 отсто, а најголем пад се забележува во регионот на Истра, во Далмација намалувањето на прометот во угостителскиот сектор е меѓу 10 и 20 отсто, а во рестораните на островите е остварен помал промет до 50 отсто.
Долгогодишниот претприемач во туризмот во Истра, Јасмин Шабиќ, вели дека намалениот туристички промет годинава во Хрватска се должи на угостителите и трговците со превисоките цени на нивните услуги и производи.
- Имам две куќи за изнајмување во кои престојуваат гости со повисоки приходи. Моите гости во претходните години одеа во ресторани три пати неделно, а сега не одат затоа што не сакаат да плаќаат превисоки цени. Тие приготвуваат јадења дома. Скапо е и за гостите од Англија. Ни тие не одат во ресторани затоа што се чуствуваат дека плаќаат прескапо, Многу мои пријатели од Германија ми велат дека не се сигурни дека повторно би дошле на летување во Истра, која веќе не им делува дека е евтина дестинација, вели Шабиќ, пренесува „Сеебиз“.
фото freepic