Бизнис
Фармите во Грција за производство на фета сирењето најпогодени од заразата кај овците и козите
02.08.2024
Откривањето на заразната болест кај овците и козите во Грција ги покажа недостатоците на системот за следење на увозот на живи животни, како и механизмот за ограничување на работата на фармите со овци и кози. Со појавата на чума кај животните најпогодени се фармите кои произведуваат млеко за правење на сирење, посебно на познатата фета, бидејќи во текот на летото има зголемено побарување за овчо и козјо месо и млечни производи, пишува грчки „Катимерини“.
Грција потврди дека се откриени 22 случаи на животинска чума во фармите за кози и овци во реоните на Тесалија, Централна Грција, Коринт, Пелопонез и на Атика. Болеста не може да се пренесе од животни на луѓе, но потребна е добра термичка обработка за да бидат производите безбедни за исхрана. Досега се уништени над десет илјади животни. Според европските прописи, сите животни во заразените трла мораат да бидат уништени, по што се врши дезинфекција на просторот.
Како одговор на епидемијата, грчкото министерство за земјоделство воведе забрана за движење на козите и овците во целата земја за да се спречи ширењето на болеста.
Поради ширење на заразата и Романија привремено забрани пуштање овци и кози на пасишта во период од три недели поради појава на чума кај преживари, соопшти прес-службата на романското Министерство за земјоделство.
Романската национална агенција за ветеринарство и безбедност на храна објави дека заклучно со 17 јули имало 37 активни жаришта на болеста во земјата, а најголем број на жаришта (34) е забележан во округот Тулчеа на границата со Украина. Во Романија се идентификувани вкупно 218.756 заразени овци и кози низ целата земја, објавија романските ветеринарни служби.
фото freepic