Малите и средни претпријатија од Германија се повеќе ја шират својата мрежа на набавки кон Индија, додека снабдувачите од САД ја губат својата позиција. По неколкуте неизвесни години во глобалната трговија, околу 40 отсто од германските компании планираат да ги реконструираат своите синџири за снабдување, покажало истражувањето  кое го спроведе ДЗ Банкa.

Поголемите фирми со годишен промет од 50 милиони евра ја разгледуваат опцијата за проширување на трговските односи со Индија. Околу 15 отсто од германските мали и средни претпријатија планираат да го направат истиот потег. Резултатите од истражувањето, во кое учествувале 1.000 директори и носители на одлуки,  покажуваат дека Индија станува “најинтересна неевропска земја за малите и средните претпријатија кои ги реорганизираат своите синџири за набавка“.  

По неколку години на ниски трошоци за енергија и големи субвенции со кои САД ги привлекуваше германските компании,  само 12 отсто од малите и средните компании во Германија  сега се насочени кон американскиот пазар, за разлика од 15 отсто во 2022 година.  Околу девет отсто од германските компании целосно се подготвени да се повлечат од САД, посебно  фирмите од хемискиот сектор.

Околу 17 отсто од анкетираните претпријатија сметаат дека Кина ќе стане важен партнер за нивното работење во следните пет години.

Европа, останува најважен трговски регион за германските компании, а 21 отсто од нив сакаат да ги прошират своите синџири за набавка во западна Европа и 24 отсто во средна и источна Европа, се наведува во анализата на ДЗ Банка, која беше достапна за новинската агенција ДПА.

фото freepic