Бизнис
Туристите ги избегнуваат жештините во јужна Европа и летуваат во Скандинавија
29.07.2024
Глобалното загревање и високите температури во земјите од јужна Европа во текот на летните месеци влијаат на менување на навиките на туристите кои почесто се одлучуваат да летуваат во скандинавските земји, во кои има посвежа клима.
Минатата година приходите од туризмот во земјите од скандинаскиот регион се зголемени за шест отсто во однос на 2022 година и достигнаа 124 милијарди долари, пренесува „Блумберг“.
Бројот на летните резервации во државите од Скандинавија се зголемени за 27 отсто. Во Шведска резервациите во хотелските објекти се повисоки за 47 отсто, а во Исланд за 49 отсто.
За споредба, резервациите за летување во Италија се повисоки за три отсто во споредба со минатото лето.
Европската комисија минатата година објави анализа за можното влијание на климатксите промени на европскиот туризам. Експертите од областа на туризмот забележаа дека глобалното загревање е причина за новиот тренд на туристичкиот пазар.
Последните години земјите од јужна Европа се повеќе се соочуваат со екстремните летни температури, што се одразува на изборот на туристите кои избираат посвежи региони за одмор во летниот период, пренесува „Бизнис и финансии“.
фото freepic