Бизнис
ЕУ подготвува привремени царини за увоз на кинескиот биодизел?
26.07.2024
Европската Унија е подготвена да воведе привремени царини за кинескиот биодизел, по сознанието дека на пазарите на ЕУ тој се продава по неоправдано ниски цени. Европската комисија, која го надгледува спроведувањето на трговската политика на ЕУ, предложи воведување на привремени тарифи меѓу 12,8 и 36,4 отсто. Царините би требало да бидат применети кон средината на август годинава, се наведува во документот на ЕК, пренесува „Ројтерс“.
Истрагата на состојбата на пазарот ќе продолжи до февруари следната година, кога ќе биде донесена конечна одлука за новите тарифи кои би се применувале во период од пет години.
Европската Унија веќе применува привремени царини за електричните возила кои се произведени во Кина, бидејќи смета дека овие производи се неправедно субвенционирани. Европскиот одбор за биодизел (ЕББ), кој поднесе и жалба, претходно соопшти дека продажбата на биодизелот од Кина, според „сегашната ценовна дампинг политика“, има разорно влијание на производството во ЕУ. Некои компании од ЕУ затворија дел од своите капацитети за производство на биодизел или ги одложија своите нови проекти.
Од ЕББ соопштуваат дека кинеските компании извезле 1,8 милиони тони биодизел во Европската Унија во 2023 година, што е 90 отсто од вкупниот кинески извоз на биодизел , пренесува „Нова економија“.
фото freepic