Бизнис
Доделени наградите од Стопанската комора, бизнисот бара партнерски однос од Владата
25.07.2024
Стопанската комора на Северна Македонија, по повод одбележувањето на 102 години од своето постоење, денеска ги врачи наградите за компаниите, организациите и поединците, кои со своето досегашно ангажирање придонеле за унапредување на работата на Комората и за развој на македонската економија. Наградата за долгогодишна коморска активност им беше врачена на бизнисмените Илија Гечев од „ИГМ трејд“ и на Петар Спасевски од АСП-ПАК од Охрид, - Наградата за воведување напредни технологии, дигитализација и зелена агенда ја доби ЕВН, додека на премиерот Христијан Мицковски и на УСАИД им беше доделена Награда за градење на партнерства, засилување на врската и заеднички дејствувања во градењето на просперитетна македонска економија.
Наградите ги додели претседателот на Стопанската комора, Бранко Азески, кој од новата Влада побара партнерски однос и чесност во намерите за соработка, како и исполнување на тоа што е ветено – транспарентност во работата, борба против митото и корупцијата, градење систем на институции и стимулирање на бизнисот.
- Комората ќе биде сериозен партнер на Владата и конструктивен партнер на државата. Ние сме професионална институција што ја интересира единствено добар и поволен деловен амбиент, фирмите да остварат профит и да отвораат нови работни места,истакна Азески.
Стопанската комора му ја додели награда на премиерот Христијан Мицкоски за градење партнерство и заедничко дејствување за просперитетна Македонија, а повод за тоа беше и поддршката на партијата кога беше во опозиција и кога во септември 2022 година го потпиша првиот документ на Декларација од 100-годишнината со кој се инсистираше во оваа држава конечно да се направи голем договор за давање приоритет на економијата во наредните 10 години.
- За мене ова е голема чест, но и одговорност. Изминативе први 30 дена оставаме срце на терен за да направиме нешто. Настапуваме патриотски, тоа што е интерес за граѓаните е и наш интерес, работиме посветено, не се штедиме, истакна Мицкоски.
Тој пред присутните стопанственици ги потврди заложбите на Владата за поддршка на македонските компании со обезбедување на 250 милиони евра од кредитот од Унгарија под поволни услови, а чија прва транша може да биде повлечена во септември годинава. Покрај ова, на македонските компании им стојат на располафгање и средствата со ребалансот на буџетот за капитални инвестиции и од други извори на финансирање, со што вкупната директна помош за активности на компаниите би надминала милијарда евра, додаде Мицковски.
Сашо Салтировски од ЕВН нагласи дека во наредниот период стојат многу предизвици во развојот на енергетскиот сектор, а како посуштински ги спомена развојот на обновливите извори на енергија, поголеми инвестиции во базната енергетика и во батериите.
Петар Спасевски, сопственикот на компанијата АСП ПАК од Охрид, нагласи дека рбетот на развојот на македонската економија се малите и средните претпријатија, кои се главните извозници, и како што рече тие треба да бидат во фокусот на новата владина политика.
- Не сакаме да играме во шеста лига, сакаме во прва. Сакаме да ја направиме најголемата инвестиција, а потенцијал имаме, изјави Илија Гечев сопственикот на ИГМ – Кавадарци, кој и порача на новата Влада да го комплетира тимот со искусни економисти.