Бизнис
Став на секретарот на ОПЕК: Светот нема да може да функционира без фосилни горива
02.07.2024
Светот не може да функционира исклучиво на обновливи извори на енергија и ваквото сценарио е нереално. Заговорниците на ова сценарио немаат целосна слика за трошоците на оваа транзиција ни за брзината по која таа реално може да се одвива, изјави Хаитам ал Гаис, генерален секретар на ОПЕК, кој се осврна на предвидувањата на Меѓународната агенција за енергија (ИЕА) дека побарувачката за критичните минерали, како што се литиум и кобалт, ќе се зголеми за четирипати до 2040 година, за да се постигне целта за нулта емисија до 2050 година.
Вадењето на ретките минерали од рударските наоѓалишта не можат да се оствари без користењето на фосилните горива, смета генералниот секретар на групата земји производители на нафта. Според него, јагленот и природниот гас се од витално значење за преработка на рудата која содржи критични минерали од кои се добиваат производи за електрични возила.
- Производите од нафта се користат за багери, булдужери и други тешки возила, како и за разни облици на транспорт на минералите, но и за производство на соларни панели, ветерни турбини и електрични возила, вели Хаитам ал Гаис.
Светот не може да функционира без фосилни горива и не е реално да се очекува дека обновливите извори на енергија можат да го покријат очекуваниот раст на побарувачката за електрична енергија. Ова од причина што во светот во последните две години се вложени над 9,5 билиони долари во енергетска транзиција, но енергијата добиена од ветерот и сонцето покрива до четири отсто од потрошувачката на светската енергија, забележува Хаитам ал Гаис, пренесува Б92.
фото freepic