Бизнис
Грција воведе шестдневна работна недела
02.07.2024
Грција воведе доброволна шестдневна работна недела во одделни индустрии за да го поттикне економскиот раст и за да ја зголеми продуктивноста. Како што соопштуваат грчките официјални власти, шестдневната работна недела се однесува на приватните претпријатија во Грција кои даваат услуги 24 часа дневно. Во рамките на продолжената работна недела, вработените во одбраните индустрии и производни погони ќе имаат можност да работат дополнително два часа дневно или да воведат дополнителна осумчасовна смена, но со дополнителен надомест за работниците од 40 отсто на редовната дневница, објави „Гардијан“.
Грција стана првата земја во Европска Унија која им дозволи на компаниите да воведат шестдневна работна недела, што има за цел да ги задоволи потребите на зголеменото производство.
Владата на Кирјакос Мицотакис вели дека иницијативата е неопходна поради двојната опасност од намалувањето на населението и недостигот на квалификувани работници. Се проценува дека речиси 500.000 главно млади образовани Грци ја напуштиле земјата од почетокот на финансиската криза во 2009.