Бизнис
Спогодбата за слободна трговија меѓу Србија и Кина се применува од утре
30.06.2024
Спогодбата за слободна трговија меѓу Србија и Кина стапува на сила од утре и со неа ќе бидат опфатени повеќе од 10.412 српски и 8.930 кинески производи. Со договорот за трговска соработка меѓу двете земји, кој е потпишан во октомври 2023 година, на првиот ден од неговата примена ќе бидат ослободени од царина околу 60 отсто од производите. Во наредните пет до десет години ќе има дополнително ослободување на 30 отсто од производите, а најосетливите производи (како што се земјоделските) ќе продолжат да бидат под режимот на заштита.
За производите кои ќе бидат ослободени од царина во првите пет години ќе се плаќаат за 20 отсто помали царински трошоци . Намалување од десет отсто на царините ќе се плаќа за производите кои се ослободени во периодот од десет години, пренесува „Нова“.
Компаниите кои ќе ги користат поволностите од овој договор мораат да докажат дека 50 отсто од вредноста на секој производ кој се извезува потекнува од матичната земја.
Надворешната трговска размена меѓи Србија и Кина во 2023 година изнесуваше 6,09 милијарди долари, од нив 1,2 милијарди е извоз од Србија.
Во Србија делуваат 1.560 правни субјекти со мнозинство кинески капитал и во нив работат 20.600 лица, а третина од странските инвестиции во Србија се од Кина.
Покрај Србија во земјите од Европа, Кина има склучено ваков договор за слободна трговија со Швајцарија и Грузија, пренесува „Бизнис лаив“.
фото freepic