Бизнис
Норвешка започнува со експлоатација на рудни наоѓалишта на морското дно
27.06.2024
Норвешка е првата земја која ќе започне комерцијално рударење на морското дно на Арктикот, заради експлоатација на руда која е потребна за соларни панели, ветерните електрани и батерии за електрични автомобили, како замена за користењето на фосилните горива. Норвешката влада ќе понуди издавање на дозволи за истражување на рудните наоѓалишта на големи површини на морското дно во својата територија во текот на првата половина од 2025 година, соопшти норвешкото министерство за енергетика.
- Светот има потреба од минерали за зелена транзиција и норвешката влада сака да ја истражи можноста за експлоатација на минералите од морското дно на одржлив начин, соопшти Терје Асланд, норвешкиот министер за енергетика.
Норвешката влада информираше дека претходните официјални процени на ресурсите покажуваат значајна акумулација на метали и минерали, како што е бакарот и други ретки елементи.
Во јануари годинава норвешкиот парламент гласаше за истражување на минерали на морското дно на околу 280.000 квадратни километри во океанското подрачје меѓу островот Јан Мајен и архипелагот Свалбард, пренесе „Еуроњуз“.
фото freepic