Бизнис
Барселона ќе го ограничи изнајмувањето станови на туристи
22.06.2024
Градските власти на Барселона најавија дека до 2028 година ќе го ограничи издавањето станови на туристи, со што сака да го спречи растот на трошоците за домување и да им овозможи на граѓаните да живеат во свој град. До ноември 2028 година, Барселона ќе ги одземе лиценците на 10.101 станови кои моментално се лиценцирани за краткорочно изнајмување, објави левичарскиот градоначалник на градот, Жауме Колбони.
Зголемувањето на интересот за изнајмување на становите за туристите, ги остави некои граѓани на Барселона да не можат да си дозволат кирија откако кириите се зголемија за 68 отсто, а цените на имотот за 38 отсто во изминатите 10 години, пренесе Мина.
- Пристапот до домување стана двигател на нееднаквоста, особено за младите луѓе, изјави градоначалникот Колбони.
Во последните десет години, локалните власти воведоа ограничувања за краткорочно изнајмување на Канарските Острови, Лисабон и Берлин.
Социјалистичката министерка за домување на Шпанија, Изабел Родригез, рече дека ја поддржува одлуката. Од хотелската асоцијација на Барселона не сакаа да ја коментираат веста.
Во последниве години во Барселона не беше дозволена регистрација на нови туристички апартмани. Од 2016 година локалната власт нареди затворање на 9.700 диви туристички станови и речиси 3.500 станови повторно ги користат граѓаните за домување, објави Бизнис.рс.
фото freepic