Бизнис
Производството од аквакултурата го надмина рибарството
17.06.2024
Светското производство на рибарство и аквакултура достигна нов рекорд и изнесува 223,4 милиони тони, што е за 4,4 отсто повеќе во однос на 2020 година. Во 2022 година произведени се 185,4 милиони тони водни животни и 37,8 милиони тони алги, покажува најновиот извештај на Организацијата за храна и земјоделство во ОН (ФАО). Во извештајот на оваа организација се наведува дека аквакултурата (одгледувањето на водени организми во слатки и морски води со помош на човекот) достигна 130,9 милиони тони храна, и за прв пат го надмина рибарството, пишува „Данас“.
Мал број земји во светот доминираат во аквакултурата. Само десет земји произвеле повеќе од 90 отсто од храна одгледувана во вода. Меѓу нив се: Кина, Индија, Индонезија, Виетнам, Бангладеж, Филипини, Република Кореја, Норвешка, Египет и Чиле.
Вкупната продажна вредност на рибарството и аквакултурата се проценува на 472 милијарди долари. Според податоците на ФАО, најголеми извозници на производи од водени животни се: Кина, Норвешка, Виетнам, Еквадор и Чиле. Најголеми увозници се: САД, Кина, Јапонија, Шпанија и Франција.
Глобалната потрошувачка на храна прозведена во вода во 1961 година изнесуваше 9,1 килограм по глава на жител. Во 2022 година ова количество е 20,7 килограми по жител.
Се очекува производството на водни животни да се зголеми за 10 отсто до 2032 година и да достигне 205 милиони тони. Во секторот на рибарство и аквакултура во 2022 година биле вработени 61,8 милиони луѓе и тоа е за милион работници помалку од 2020 година.
фото freepic