Бизнис
Кина, Европа и САД со најголеми вложувања во чиста енергија
07.06.2024
Глобалните вложувања во енергија во 2024 година ќе изнесуваат повеќе од три билиони долари, од нив два билиона ќе бидат инвестирани во обновливи извори на енергија, електрични возила, нуклеарна енергија, гориво со ниска емисија, подобрување на енергетската ефикасност или во топлотни пумпи, се наведува во извештајот на Меѓународната агенција за енергија (ИЕА).
Вложувањата во користењето на јаглен, гас и нафта годинава ќе изнесуваат билион долари.
- Вложувањата во чиста енергија ќе достигнат нови рекорди . На секој долар вложен во фосилни горива , по два долари се вложуваат во чиста енергија, изјави Фатих Бирол, извршен директор во ИЕА.
Инвестициите во соларната енергија во светот ќе достигнат 500 милијарди долари, поради намалувањето на производните трошоци што ги поттикнува новите инвестиции.
Кина ќе има најголемо учество во инвестициите во чиста енергија во 2024 година, со проценета вредност од 675 милијарди долари, следи Европа со 370 милијарди долари и САД со 315 милијарди долари. Овие три економии покриваат две третини од глобалните инвестиции во чиста енергија, пренесува „Политка“.